index introductio imagines || partitura exemplar translatio

bibliographia e-mail

CTH 404.1.II

Exemplar --

Citatio: A. Mouton (ed.), hethiter.net/: CTH 404.1.II (Expl. --, 07.05.2012)

§ 1

1 -- [U]MMA fMaštigga MUNUS URUKizzuwatna

2 -- mān=kan ABU DUMU-RU=ya našma LÚMUDU DAM=ZU=ya našma ŠEŠ NIN=ya ḫalluwanzi

3 -- nu=uš takšan kuwapi anda tittanumi

4 -- n=aš kiššan aniyami

§ 2

5 -- nu SÍG GE6 dāi

6 -- n=at UZUÌ.UDU-it [a]nda ḫūlaliyazi

7 -- n=at=za tiššatwa ḫalziššanzi

8 -- n=at=kan EN SISKUR šer ēpzi

9 -- nu kiššan memai

10 -- KAxU-it EME-it kuit memiškeš

11 -- kinun=a=wa kāša tiššatwa

12 -- nu=wa=at=kan tuḫšan ēštu NÍ.TE-aš apēdaš U4.KAM-aš EMEḪÁ

13 -- n=[at=kan GUN]NI-i peššiyaz[i]

§ 3

14 -- nu MUNUSŠU.GI EGIR-anda MUN UZ[USA UZUÌ.UDU] ŠE.LÚS[AR] DUḪ.LÀL dāi

15 -- nu DUḪ.LÀL EMEḪÁ iyaz[i]

16 -- [n=at=kan SAG.DU] EN S[ISK]UR šer arḫa waḫnuzi

17 -- MUN=ya=šmaš=k[an UZUÌ.UDU ŠE.LÚS]AR-ia UZUSA šer arḫa waḫnuzi

18 -- nu=šmaš=at [parā ēpz]i

19 -- n=at GÙB-laz kiššaraz and[a waḫnuwanz]i

§ 4

20 -- nu MUNUSŠU.GI kiššan me[ma]i

21 -- kuit=wa=za=kan kuit ištarna ḫurzaketten

22 -- kinun=a=wa apūš ḫurdāuš EMEḪÁ DUTU-uš GÙB-la waḫnuddu

23 -- n=at=kan ḫaššī peššeyazi

§ 5

24 -- nu=kan1 ANA EN SISKUR kuit SÍG SA5 SÍG ZA.GÌN NÍ.TE-aš kitta

25 -- išnaš=ma=ašmaš kue 2 ALAM peran katta kitta2

26 -- [iš]naš=ma=šmaš QATU EMEḪÁ=ya kue INA SAG.DU=ZUNU kianta

27 -- n=at=šamaš=kan MUNUSŠU.GI arḫa dāi

28 -- nu=šmaš=kan šūil arḫa tuḫšari

29 -- išnaš=a 2 ŠUḪÁ EMEḪÁ MUNUSŠU.GI duwarnizzi

§ 6

30 -- nu=šmaš=kan š[e]r arḫa waḫnuzi

31 -- nu kiššan memai

32 -- [tu]ḫšaru apel [U]4-aš EMEḪÁ

33 -- tuḫšaru=wa3 apel U4.KAM-aš uddā[r]

34 -- n=at=kan [ḫaššī peš]šiyazi

§ 7

35 -- EGIR-anda=ma MUNUSŠU.GI [IM?-a]n dāi

36 -- nu=(š)šan šer arḫa 7 EMEḪÁ [iyazzi]

37 -- [n=aš]=kan ANA 2 BĒL SÍSKUR [š]er arḫa waḫnuzi

38 -- nu kišša[n memai]

39 -- [ḫ]aššikke[tt]en [ku]edani U4-ti

40 -- nu=wa kāša [apel U4].KAM-aš EMEḪÁ šumāš

41 -- kāša addāš DUTU-u[š tarmāi]t

42 -- n=at=kan ḫaššī dāi

§ 8

43 -- nu MUNUSŠU.GI wā[tar išn]an=[(n)a d]āi

44 -- nu=šmaš=kan wātar [š]a[r]ā papparašz[i]

45 -- n=u[š šupp]iyaḫḫi

46 -- [na]mma=šmaš=kan iššanan=(n)a šer ar[ḫ]a waḫnu[zi]

47 -- nu kiššan memai

48 -- parkuēš=wa=za namma ēšten K[AxU-i]t EME-it

49 -- nu=kan iššanan ḫaššī dāi

§ 9

50 -- nu UDU uniyanzi

51 -- n=an=kan MUNUSŠU.GI ANA 2 EN SISKUR šer ēpzi

52 -- nu kiššan memai

53 -- kāša=wa=šmaš tarpalliš

54 -- nu=wa=šma[š] NÍ.TE-aš tarpalliš ēšdu

55 -- KAxU-i EME-[i] ḫurdāuš

56 -- nu=(š)ši=ka[n] KAxU-i anda allapaḫḫanzi

§ 10

57 -- nu kiš[šan memai]

58 -- idalauēš=wa=kan ḫurdāuš pa[r]ā al[l]apaḫten

59 -- nu tēkan [paddanzi]

60 -- [nu=ka]n UDU kattanda ḫattanzi

61 -- [n]amma=an=ka[n kattanda] tianzi

§ 11

62 -- nu=(š)ši NINDA.GUR4.RA KU7 awan katta [tianz]i

63 -- GEŠTIN=ya [š]ipanti

64 -- nu šer anda appan[zi]

§ 12

65 -- nu UDU GE6 [ū]nniyanzi

66 -- n=an=šam[aš=š]an MUNUSŠU.GI šer ēpzi

67 -- [nu k]iššan memai

68 -- SAG.D[UMEŠ=w]a=šmaš NÍ.TE-aš [ḫ]ūmand[aš] tarpalliš UDU GE6

69 -- KA[×U-i] EME-i [ḫ]urtiyaš=(š)a EGIR-an

70 -- n=an=šamaš=šan [še]r arḫa waḫ[nuzi]

§ 13

71 -- [nu]=(š)ši=kan 2 [E]N SISKUR KAxU-i anda al[lapaḫ]ḫanzi

72 -- nu UDU ḫadd[a]nzi

73 -- namma=an arḫ[a ḫap]pešša[nanzi]

74 -- nu GUNNI i[a]n[z]i

75 -- n=an arḫa [warnuwanzi]

§ 14

76 -- LÀL=ya=(š)ši=kan Ì GIŠ[S]ERTUM šer lāḫuwanzi

77 -- [NINDA.GUR4.RA KU7 parš]iya

78 -- n=an=kan ḫaššī anda peššiyazi

79 -- GEŠTIN=ya šipanti

§ 15

80 -- nu MUNUSŠU.GI ŠAḪ.TUR dāi

81 -- n=an=šamaš=kan šer ēpzi

82 -- nu kiššan memai

83 -- kāša=war=aš Ú-it ḫalkit warkanza

84 -- nu=wa kāš EGIR-an UL nepiš aušzi

85 -- EGIR-pa=ma=wa=za=kan ŠAḪ.TURḪÁ UL aušzi

86 -- nu kūš ENMEŠ SISKUR idālauēš ḫurdāēš QĀTAMMA lē uwanzi

§ 16

87 -- nu=šmaš=kan ŠAḪ.TUR šer arḫa waḫnuzi

88 -- namma=an=kan kunanzi

89 -- nu tekan paddānzi

90 -- n=an=kan kattanda tianzi

91 -- NINDA.GUR4.RA=ya awan katta tianzi

92 -- GEŠTIN=ya4 šipanti

93 -- nu tekan anda appanzi

§ 17

94 -- nu MUNUSŠU.GI IM DUGišnūran iēzzi

95 -- nu=kan iššanan tepu anda dāi

96 -- kappani=ya=kan GE6 anda peššiyazzi

97 -- n=at=kan ANA 2 EN SÍSKUR šer arḫa waḫnuzi

98 -- nu kiššan memai

§ 18

99 -- kāš=wa IM-aš maḫḫan wappui EGIR-pa UL paizzi

100 -- kappani=ma=wa ḫarkēšzi UL

101 -- nu=war=at=za damai NUMUN-an UL kišari

§ 19

102 -- iššanaš=ma=wa=kan kāš DINGIRMEŠ-aš NINDAḫarši UL paizzi

103 -- kēdaš=a=wa=kan ANA 2 EN SÍSKUR idāluš EME-aš NÍ.TE-aš QĀTAMMA lē paizzi

§ 20

104 -- nu MUNUSŠU.GI ḫarziyallan dāi

105 -- nu=(š)ši=kan SÍG SA5 SÍG ZA.GÌN anda ḫulaliyazi

106 -- n=an=kan ANA 2 EN SÍSKUR šer arḫa waḫnuzi

107 -- nu kiššan memai

§ 21

108 -- karapdu=wa piddālliš GÌR-aš idālun EME-an

109 -- nu=war=an iškišaz karapdu

110 -- ZU9-az=(zi)ya=wa[r=at]6 karapdu idālu KAxU-iš idālun EME-an

§ 22

111 -- EGIR-anda=ma=za MUNUSŠ[U.GI] UR.TUR dāi

112 -- n=an=kan ANA 2 EN SISKUR š[er arḫa] waḫnuzi

113 -- nu kiššan memai

114 -- tarpalliš=wa NÍ.TEMEŠ-aš ḫūmandaš

§ 23

115 -- nu=(š)ši=kan iššī anda allapaḫḫanzi

116 -- nu kiššan tezzi9

117 -- parā=war=an=kan10 allapaḫten apel U4.KAM-aš ḫurtauš11

118 -- nu=kan UR.TUR kunanzi

119 -- namma=an ḫāriyanzi

§ 24

120 -- nu=kan MUNUSŠU.GI ANA 2 EN SISKUR wātar šarā papparašzi13

121 -- n=aš parkunuzi

122 -- iššanan=a=šmaš=kan šer arḫa waḫ[nu]zi

§ 25

123 -- EGIR-anda=ma14 IM-aš išnuran iē[z]zi

124 -- [n=a]š[t]a15 Ì-an anda lāḫuwai

125 -- SÍG ZA.GÌN=ya=kan anda peššiyazi

126 -- karšan=(n)a=kan anda išḫui

127 -- n=at MUNUSŠU.GI ANA 2 EN SISKUR TÚGše[kn]uš kattan ēpzi

§ 26

128 -- nu kiššan memai

129 -- k[āša=wa] ŠA DIŠTAR DUGišnuraš

130 -- nu=wa=šmaš [āšš]ui TI-anni parā tarnan ḫardu

131 -- idālaue=ma=wa=šma[š=kan u]d[d]āni QĀTAMMA munnāid[du]

§ 27

132 -- EGIR-anda=ma [7 DUGḫupuwai] dāi

133 -- n=at=kan GEŠTIN-it Ì SERTUM pittalwanit16 [LÀ]L-it šun[nai]

134 -- GIŠINBIḪÁ=ya=(š)ša[n] GIŠPÈŠ GIŠGEŠTIN ḪÁD.D[U.A] UZUSA MUN UZUÌ.UDU anda dāi

§ 28

135 -- [nu=kan MUNUSŠU.G]I DUGḫupuwai ḫaššī anda [laḫu]škezzi

136 -- DUGḫūpuwaya=ma duwarnieškezzi

137 -- nu memiškezzi

138 -- duwarnadu=war=at DUGḫupuwai KAxU-it EME-it

§ 29

139 -- nu maḫḫan DUGḫupuwai duwarnizzi19

140 -- 6 NINDA.SIGMEŠ=ya paršiyannai

141 -- n=at=kan ḫaššī anda20 peššiškezzi

§ 30

142 -- [nu] UDU ūnniyanzi

143 -- n=an=za nakkuššin ḫalzeššai

144 -- nu=za MUNUSŠU.GI NINDA.GUR4.RA KU7 1 DUGKUKUB GEŠTIN=ya dā[i]

§ 31

145 -- nu UDU DUTU-i ḫikzi22

146 -- nu [MUNUSŠ]U.GI kiššan memai

147 -- DUTU-i kāša=wa=šmaš nakkuššiš KAxU-it23 EME-it

148 -- nu=kan UDU šipanti

149 -- NINDA.GUR4.RA=ya paršiy[a]

150 -- GEŠTIN=ya šipanti

151 -- UDU=ma=kan UL namma kunanzi

152 -- n=an=za MUNUSŠU.GI=[p]at dāi

§ 32

153 -- nu=za24 MUNUSŠU.GI 7 GAG URUDU dāi

154 -- NINDA.GUR4.RA KU7=ya=za tarnaš 1 GA.KIN.AK 1 DUGKUKUB GEŠTIN dāi

155 -- nu NINDA.GUR4.RA GA.KIN.AK=ya DUTU-i paršiya

156 -- GEŠTIN=ya šipanti

§ 33

157 -- namma MUNUSŠU.GI26 7 GAGḪÁ URUDU dāi

158 -- nu tekan tarmāizzi

159 -- nu kiššan memai27

160 -- tarmān=war=at ēšdu KAxU-it EME-it28 DUTU-i kattan

§ 34

161 -- EGIR-anda=ma MUNUSŠU.GI NINDA.GUR4.RA29 GA.KIN.AK GAL30 GEŠTIN=ya dāi

162 -- nu ANA 2 EN SÍSKUR parā ēpzi31

163 -- nu=(š)šan QATAM tianzi

§ 35

164 -- nu MUNUSŠU.GI NINDA.GUR4.RA GA.KIN.AK=ya DUTU-i paršiya

165 -- GEŠTIN=ya šipanti

166 -- nu kiššan tezzi

167 -- šarlānza=wa DUTU-uš KAxU-i EME-i EGIR-[Š]U

§ 36

168 -- nu paḫḫur ZAG-az GÙB-laz=(zi)ya BIL-anzi

169 -- ištarna=ma=kan 7 NA4ḫuwaši išgaranzi

170 -- nu MUNUSŠU.GI 1 NINDA.GUR4.RA tarnaš GA.KIN.AK=ya ANA 2 EN SISKUR parā ēpzi

171 -- nu=(š)šan QATAM tianzi

§ 37

172 -- nu MUNUSŠU.GI NINDA.GUR4.RA paršiya

173 -- GEŠTIN=ya šipanti

174 -- nu kiššan memai

§ 38

175 -- kuiš=war=at uetešket NA4ḫuwāšiḪÁ tānita

176 -- kinun=a=war=at=kan kāša lagāri

177 -- nu=wa=kan ANA 2 EN SISKUR kuit apēdani U4-ti KAxU-az EME-az uit

178 -- nu=wa=kan apē=ya uddār QĀTAMMA lagāru

§ 39

179 -- [nu=ka]n 2 EN SISKUR NA4ḫuwāšiḪÁ GÌRḪÁ-az [šuen]zi

180 -- n=aš=kan paḫḫur ištarna arḫa paizzi

181 -- nu TÚGNÍG.LÀMMEŠ kue [wašš]an ḫarkanzi

182 -- n=at=za arḫa [p]eššiyanzi

183 -- n=at=za MUNUSŠU.GI dāi

§ 40

184 -- nu=šmaš=kan DUGÚTUL šer arḫa waḫnuzi

185 -- DUGDÍLIM.GAL=ma=šma[š] GÌRḪÁ-aš kattan dāi

186 -- nu kiššan memai

187 -- kāša=wa=šmaš=ma=aš š[umaš] ŠA SAG.DUMEŠ=KUNU tarpalliš

188 -- kāša=wa DUGDÍLIM.GAL

189 -- nu=wa=(š)šan ḫūmanda uddār IŠTU GÌRMEŠ=KUNU arteni

190 -- nu DUG[ÚTUL] MUNUSŠU.GI duwarnizzi

191 -- DUGDÍLIM.GAL=ma 2 EN SÍSKUR IŠTU GÌRMEŠ=ŠUNU duwarnanzi

192 -- nu kiššan tezzi

193 -- [duwarnattar]u=war=at ḫūmanda uddār [ḫurtāu]š=(š)a

§ 41

194 -- nu MUNUSŠU.GI DUTU-waš uelku dāi

195 -- n=at=za tiwariya ḫalziššai

196 -- nu 2 EN SISKUR NÍ.TEḪÁ-uš warši

197 -- nu kiššan tezzi

198 -- katta=war=ašma[š=kan] waršan ēštu idālauwa uddār KAxU-aš EME-aš

§ 42

199 -- nu MUNUSŠU.GI wātar IŠTU GAL našma [ḫ]ūpparaza dāi

200 -- n=at ANA 2 EN SISKUR parā ēp[z]i

201 -- NA4nitri=ya=kan anda šuḫḫan

202 -- nu=za=kan 2 EN SISKUR wātar INA SAG.DUMEŠ=ŠUNU šarā laḫuwanzi

203 -- QATITEMEŠ=ŠUNU=ya=za=kan IGIḪÁ=ŠUNU arranzi

§ 43

204 -- namma=kan ANA SI.GU4 anda laḫuwanzi32

205 -- n=at 2 EN SISKUR šer šiyanzi

206 -- nu MUNUSŠU.GI kiššan me[m]ai

207 -- kuwapi=wa karūilēš LUGALMEŠ EGIR-pa uwanzi

208 -- nu=wa=za KUR-iaš šaklāin33 EGIR-an kappuwanzi

209 -- kī=ya=wa NA4KIŠIB apiyakku kinutta[r]u34

§ 44

210 -- DUB.1.KAM AWAT fMaštigga MUNUS URUKummanni

211 -- mān=kan ABU DUMU-RU=ya LÚMUTU DAM=ZU=ya našma ŠEŠ NIN=ya ḫallūwanzi

212 -- n=uš takšan kuwāpi anda tittanumi

213 -- n=uš kiššan aniyami QATI

214 -- ŠU IḪan[ikku-DINGIR-LIM DUB].SAR

215 -- DUMU INU.[GIŠKIRI6]